Poet
ham muue phirte hain aur ḳhvahish-e-jan hai us ko
ab talak bhi vahi jiine ka guman hai us ko
ai dil afsurdagi-e-dagh se kyuun hai tu malul
jo gul is baagh men aaya hai ḳhizan hai us ko
qissa-e-barhana-pa.i ko mire ai majnun
ḳhaar se puchh ki sab nok-e-zaban hai us ko
aage us gul ke na maara kabhu ghunche ne to dam
chahe bulbul so kahe tab-e-bayan hai us ko
ai falak bojh do aalam ka tu ‘qa.em’ pe na Daal
apni hasti bhi kuchh in rozon garan hai us ko
kar ke he he ai nam-e-ashk tu rove mujh ko
aaj agar sail men ḳhuun ke na Dubove mujh ko
ḳhaak juun aa.ina milna mujhe rakhta hai shugun
tira-tar huun main jo paani se to dhove mujh ko
fa.eda gul ka na mujh se hai na saa.e ki umiid
kah do dahqan se ki ba-huda na bove mujh ko
garmi-e-nala se main aaj jala jaata huun
ko dam-e-sard ki aa kar vo samove mujh ko
saath hai sang o sharar ka ye kaho us but se
kya ho aghosh men gar le ke vo sove mujh ko
na mulaqat na ashfaq na va.ada na payam
kyunki taskin tire hijr men hove mujh ko
ḳhatam-e-dast-e-sulaiman se huun ‘qa.em’ main aziiz
saḳht pachhta.e vo jo haath se khove mujh ko
Leave a Reply