ham ko aisa guman hone laga
vaqt kuchh mehrban hone laga
dil men kis ka ḳhayal aaya hai
ḳhushbu ḳhushbu makan hone laga
us ne zulfen bikher diin apni
badalon ka guman hone laga
phir kabutar uḌaa.e hain us ne
phir lo amn-o-aman hone laga
un ki nazren badal ga.iin shayad
vaqt na-mehrban hone laga
phir vo ruTha hai chand sa chehra
phir mira imtihan hone laga
dil nahin hai dimagh ke taabe
muntashir ḳhandan hone laga
umr ka kaun sa paḌav hai ye
jism jarjar makan hone laga
ab zamin par qadam nahin Tikte
qad mira asman hone laga
koi qimat nahin hai iman ki
ye bhi muflis ki jaan hone laga
aa ga.e din chhaḌi pakaḌne ke
mera beTa javan hone laga
jab se saaya uTha buzurgon ka
sar se gum sa.eban hone laga
ruuh ukta ga.i badan se ‘suhaib’
jism jab se kaman hone laga
Leave a Reply