ham kahan azmat aslaf sambhale hue hain
bas tire ishq se mathe ko ujale hue hain
qais o farhad ta.iin apne havale hue hain
ya.ani ham masnad-e-ushshaq sambhale hue hain
jab bhi palTe hain hamen haar dikha.i di hai
ham ne sikke ye ka.i baar uchhale hue hain
pyaas lagti hai inhen dekh ke ai dasht-nashin
teri ankhen hain ya paani ke pyale hue hain
ham ne ik umr kitabon ke havale ki hai
tab kahin ja ke kitabon ke havale hue hain
a.ina ban ke khaḌe hain tire dar par chup-chap
kab tire samne ham bolne vaale hue hain
suud baḌhta gaya sanson ka hamare uupar
ham mohabbat men tiri qarz se kaale hue hain
main bhi phir baiTh gaya dekhne qissa kya hai
ret giili hai ya phir paanv men chhale hue hain
Leave a Reply