Shakeel Azmi
main janta huun ḳhushamad-pasand kitna hai
ye asman zamin se buland kitna hai
tamam rasm uTha li ga.i mohabbat men
dilon ke biich magar qaid-o-band kitna hai
jo dekhta hai vahi bolta hai logon se
ye aa.ina bhi haqiqat-pasand kitna hai
tamam raat mire saath jagta hai koi
vo ajnabi hai magar dard-mand kitna hai
main us ke baare men akasr ye sochta huun ‘shakil’
khula hua hai vo itna to band kitna hai
Leave a Reply