ham ji rahe hain koi bahana kiye baghair
us ke baghair us ki tamanna kiye baghair
ambar us ka parda-e-hurmat bana miyan
divar tak nahin giri parda kiye baghair
yaran vo jo hai mera masiha-e-jan-o-dil
be-had aziiz hai mujhe achchha kiye baghair
main bistar-e-ḳhayal pe leTa huun us ke paas
sub.h-e-azal se koi taqaza kiye baghair
us ka hai jo bhi kuchh hai mira aur main magar
vo mujh ko chahiye koi sauda kiye baghair
ye zindagi jo hai use ma.ana bhi chahiye
va.ada hamen qubul hai iifa kiye baghair
ai qatilon ke shahr bas itni hi arz hai
main huun na qatl koi tamasha kiye baghair
murshid ke jhuuT ki to saza be-hisab hai
tum chhoḌiyo na shahr ko sahra kiye baghair
un anganon men kitna sukun o surur tha
ara.ish-e-nazar tiri parva kiye baghair
yaran ḳhusha ye roz o shab-e-dil ki ab hamen
sab kuchh hai ḳhush-gavar gavara kiye baghair
girya-kunan ki fard men apna nahin hai naam
ham girya-kun azal ke hain girya kiye baghair
aḳhir hain kaun log jo baḳhshe hi ja.enge
tariḳh ke haram se tauba kiye baghair
vo sunni bachcha kaun tha jis ki jafa ne ‘jaun’
shii.a bana diya hamen shii.a kiye baghair
ab tum kabhi na aaoge ya.ani kabhi kabhi
ruḳhsat karo mujhe koi va.ada kiye baghair
Leave a Reply