ham dahr ke is virane men jo kuchh bhi nazara karte hain
ashkon ki zaban men kahte hain aahon men ishara karte hain
kya tujh ko pata kya tujh ko ḳhabar din raat ḳhayalon men apne
ai kakul-e-giti ham tujh ko jis tarah sanvara karte hain
ai mauj-e-bala un ko bhi zara do chaar thapeḌe halke se
kuchh log abhi tak sahil se tufan ka nazara karte hain
kya janiye kab ye paap kaTe kya janiye vo din kab aa.e
jis din ke liye ham ai ‘jazbi’ kya kuchh na gavara karte hain
Leave a Reply