ham bahut duur nikal aa.e hain chalte chalte
ab Thahar jaa.en kahin shaam ke Dhalte Dhalte
ab gham-e-zist se ghabra ke kahan ja.enge
umr guzri hai isi aag men jalte jalte
raat ke ba.ad sahar hogi magar kis ke liye
ham hi shayad na rahen raat ke Dhalte Dhalte
raushni kam thi magar itna andhera to na tha
sham-e-ummid bhi gul ho ga.i jalte jalte
aap va.ade se mukar ja.enge rafta rafta
zehn se baat utar jaati hai Talte Talte
TuuTi divar ka saaya bhi bahut hota hai
paanv jal jaa.en agar dhuup men chalte chalte
din abhi baaqi hai ‘iqbal’ zara tez chalo
kuchh na sujhega tumhen shaam ke Dhalte Dhalte
Leave a Reply