hujum-e-yas men bhi aas javedan Thahri
ye apni dharti ki bu-bas-e-be-karan Thahri
vo rokte rahe mulkon ki sarhadon ke pare
kashish dilon ki to purva.i thi kahan Thahri
ummid-o-bim men kitne kanval hue raushan
tumhari chashm-e-taghaful jahan jahan Thahri
numud-e-fikr ne kitne bana.e ret pe naqsh
main kya karun ki ye tasvir be-zaban Thahri
har ek kasa-e-sar hai faqir ka piyala
zaban savali-e-bekas to be-zaban Thahri
vahi hayat jo sab ke liye thi rahat-e-jan
vahi mire liye ik marg-e-be-aman Thahri
kahin ifada kahin mol-tol ki baten
ye fikr-e-nau to kisi baniye ki dukan Thahri
Leave a Reply