ho ke bechain main bhaga kiya aahu ki tarah
bas gaya tha mire andar koi ḳhushbu ki tarah
koi saaya na mila saya-e-gesu ki tarah
saare jivan ki thakan utri hai jaadu ki tarah
meri avaz tujhe chhu le bas itni mohlat
tere kuche se guzar ja.unga sadhu ki tarah
vo jo aa jaa.e to kya hosh ka aalam hoga
jis ke aane ki ḳhabar phaili hai ḳhushbu ki tarah
zindagi pyaar vafa sab ka muqaddar yaksan
muskurahaT ki tarah hai kabhi aansu ki tarah
har taraf aag laga aa.e ho phir puchhte ho
kyuun chali bad-e-saba ab ke baras lu ki tarah
sha.eri teri ibadat ke siva kuchh bhi nahin
kar raha huun main tapasya kisi sadhu ki tarah
har alam saath raha gard-e-safar ki manind
har ḳhushi raah men mujh ko mili jugnu ki tarah
zindagi Thokaren khati hai bichhaḌ kar tujh se
teri pazeb ke TuuTe hue ghunghru ki tarah
koi ishvar kahe us ko ki ḳhuda koi kahe
vo musalman ki tarah hai na vo hindu ki tarah
apni har saans pe ehsan liye ham-dardon ka
zindagi jiita huun is ahd men urdu ki tarah
ab ye ehsas ki ḳhubi ho ki ḳhami ho ‘nur’
us ki nafrat ka dhuan bhi laga ḳhushbu ki tarah
Leave a Reply