ho jaegi jab tum se shanasai zara aur
badh jaegi shayad miri tanhai zara aur
kyuun khul gae logon pe miri zaat ke asrar
ai kaash ki hoti miri gahrai zara aur
phir haath pe zakhmon ke nishan gin na sakoge
ye uljhi hui dor jo suljhai zara aur
tardid to kar sakta tha phailegi magar baat
is taur bhi hogi tiri rusvai zara aur
kyuun tark-e-taalluq bhi kiya laut bhi aya?
achchha tha ki hota jo vo harjai zara aur
hai diip tiri yaad ka raushan abhi dil men
ye khauf hai lekin jo hava aai zara aur
ladna vahin dushman se jahan gher sako tum
jitoge tabhi hogi jo paspai zara aur
badh jaenge kuchh aur lahu bechne vaale
ho jaae agar shahr men mahngai zara aur
ik dubti dhadkan ki sada log na sun len
kuchh der ko bajne do ye shahnai zara aur
Leave a Reply