Poet
ho gar aise hi miri shakl se bezar bahut
tum salamat raho bande ke ḳharidar bahut
ham-digar jab ḳhafagi aa.i to jhagḌa kya hai
tum ko ḳhvahinda bahut ham ko tarah-dar bahut
aaj ke rone men ji Duub chala tha lekin
nala-e-dil ne rakha mujh ko ḳhabar-dar bahut
shaiḳh mujh ko na Dara gor ke andhiyare se
hijr ki kaaTi hain main ne to shab-e-tar bahut
dekhiye ab ki tab-e-ishq se kyunkar biite
ghalib aaya hai tabi.at pe ye azar bahut
sach kaho qatl pe kis ke ye kamar bandhi hai
in dinon haath men tum rakhte ho talvar bahut
‘qa.em’ aata hai mujhe rahm javani pe tiri
mar chuke hain isi azar ke bimar bahut
Leave a Reply