Jo Muddaton Mein Kisi Shokh Ka Shabab Aaya

jo muddaton men kisi shokh ka shabab aaya

rahin-e-daman-o-minnat-kash-e-hijab aaya

numud-e-sham hui vaqt-e-iztirab aaya

jahan-e-ishq-o-mohabbat men inqalab aaya

junun men ziist thi apni tilism-e-bedari

qaza ne aa ke sulaya to ham ko khvab aaya

na dil men dard hi baaqi hai ab na aankh men ashk

akhir vaqt hai payan-e-iztirab aaya

bas ab tamam hua intizar qasid ka

ki zindagi ki taraf se hamen javab aaya

ghazab thi bazm men saaqi ki tarz-e-mastana

bhara hua na koi saghar-e-sharab aaya

nizam-e-alam-e-furqat khilaf-e-qudrat tha

na mahtab hi nikla na aftab aaya

‘nazar’ iqamat-e-duniya ki khatm muddat hai

ki ham bhi piir hue vaqt-e-pa-turab aaya

Leave a Comment