afroz-alam

Hisar-e-Did Mein Roidagi Malum Hoti Hai

hisar-e-did men roidagi malum hoti hai

to kyuun andesha-e-tishna-labi malum hoti hai

tumhari guftugu se aas ki khushbu chhalakti hai

jahan tum ho vahan pe zindagi malum hoti hai

sitare misl jugnu zaiche men raqs karte hain

zara si der men kuchh raushni malum hoti hai

jahan par ek jogan mast ho kar gungunati hai

usi sahil pe ik girti nadi malum hoti hai

udasi zulf kholegi dinon ki yaad men gum hai

shuur-e-gul ko fikr-e-tishnagi malum hoti hai

jahan pe phuul khilta hai sanvarta hai bikharta hai

usi shakh-e-mohabbat pe kali malum hoti hai

satati hai tumhari yaad jab mujh ko shab-e-hijran

mujhe khud apni hasti ajnabi malum hoti hai

tumhare lams ko main jab kabhi mahsus karta huun

bahut halki sahi ik raushni malum hoti hai

fana hona andheri raat ki taqdir hai ‘alam’

mujhe ye bebasi bhi zindagi malum hoti hai

More Poems

Leave a Comment