hijr ki umr badhi hai to ham un ankhon ko
ab kisi khvab-nagar men nahin jaane denge
gham se ab dosti kar lenge
khushi ko nahin aane denge
hijr ke vaqt men ahval shab-o-roz ka kya puchhte ho
us men saaat bhi zamanon se badi hoti hai
din khada hota hai jallad ke manind sabhi raton par
raat Daain ki tarah
vaqt ke naake men adi hoti hai
hijr ke saath men vo qahr hai
jiina bhi garan aur na jiina mushkil
hijr ke haath men vo zahr hai
piina bhi muhal aur na piina mushkil
hijr darvesh nahin
hijr kam-andesh nahin
hijr nahin pir-e-mughan
hijr ayyar hai
duniya ka talabgar hai
ab tak hai javan
hijr ki umr badhi hai to chalo ham khud hi
naqsh sab dil se mita dete hain
haath jiine se utha lete hain