hijr ki be-tabiyan thiin hasraton ka josh tha
husn ka aghosh phir bhi husn ka aghosh tha
ham to jis mahfil men baiThe shaghl-e-nav-nosh tha
zindagi men maut bhi aa.egi kis ko hosh tha
zabt karte karte aḳhir phuuT nikli dil ki baat
hans paḌa gulshan men jo bhi ghuncha-e-ḳhamosh tha
ehtiram-e-husn kahiye ya use rob-e-jamal
un ka parde se nikalna tha ki main behosh tha
mujh se puchho sarguzasht-e-mai-kada bada-kasho
tha kabhi mera bhi aalam main bhi bada-nosh tha
laghzishen meri musallam ibtida-e-ishq men
aap ko bhi kuchh ḳhabar thi aap ko bhi hosh tha
ishq ka e.ajaz tha ye ishq ki tasir bhi
dil se jo naala nikalta tha sukun-e-gosh tha
koi kya samjha miri divangi ko kya ḳhabar
aap ki nazron men tha itna to mujh ko hosh tha
aaj tasbih-o-musallla le ke ‘arif’ ban gaya
kal jo ruh-e-mai-kada tha rind-o-bada-nosh tha
Leave a Reply