Poet
ab kya kahen jo mausam-e-gulshan ka haal hai
phulon se rabta na saba ka ḳhayal hai
har aarzu ki aankh men aansu lahu ke hain
kis ka ye dil ke shahr men yaum-e-visal hai
mujh ko kiya tha qaidi-e-taqdir kis liye
qudrat se intizar-e-javab-o-saval hai
jazbon ki anjuman men usi ki hai raushni
gul-ha-e-arzu men usi ka jamal hai
jo buḳhl se kiya hai ikaTTha tamam umr
tera nahin hai vo tire beTon ka maal hai
har gosha-e-zamin pe zara ghaur se paḌho
likkhi jo dastan-e-uruj-o-zaval hai
‘shahid’ vo puchhte hain mira haal kya kahun
jaisa tha pichhle saal vahi ab ke saal hai
Leave a Reply