hijab ham the hamin se hijab ho ke raha
hamara shauq kisi ka naqab ho ke raha
kamal-e-ishq ne jis dil ko intiḳhab kiya
nigah-e-husn men vo intiḳhab ho ke raha
nazar nazar ruḳh-e-saqi se faizyab hui
nafas nafas ko surur-e-sharab ho ke raha
maze mile tire dar par vo jab.ha-sa.i ke
main be-niyaz-e-azab-o-savab ho ke raha
jinhen tha rashk unhen ham pe rahm aata hai
ḳhuda ki shaan ye kya inqalab ho ke raha
uḌa uḌa sa idhar rang udhar jhuki si nazar
ajab ada se saval-o-javab ho ke raha
kamal-e-ishq ke andaz dekhna to ‘bashir’
vajud-e-bahr men shamil habab ho ke raha
Leave a Reply