hazrat-e-dil ye ishq hai dard se kasmasa.e kyuun
maut abhi se aa.e kyuun jaan abhi se jaa.e kyuun
ishq ka rutba hai baḌa ishq ḳhuda se ja mila
aap ne kya samajh liya aap ye muskura.e kyuun
mera ghalat gila sahi zulm-o-jafa rava sahi
naz-e-sitam baja sahi aankh koi chura.e kyuun
tujh se ziyada naznin is men hazaron hain hasin
dil hai ye a.ina nahin samne tere aa.e kyuun
ashiq-e-na-murad ko is ki raza pe chhoḌ do
is ki agar ḳhushi na ho gham se najat paa.e kyuun
hausla-e-sitam baḌhe tegh-o-sinan ka dam baḌhe
ek hi tir-e-naz men kijiye haa.e haa.e kyuun
‘ghalib’-e-ḳhush-bayan kahan ‘beḳhud’-e-ḳhasta-jan kahan
tab.a ka imtihan kahan shaad mujhe sata.e kyuun
Leave a Reply