Hazar Bar Miti Aur Paemal Hui Hai

hazar baar miti aur paemal hui hai

hamari zindagi tab ja ke be-misal hui hai

isi sabab se to parchhain apne saath nahin hai

saubat-e-safar-e-shauq se niDhal hui hai

sukun phir bhi to vahshat-sara-e-dil men nahin hai

nigah-e-yar agarche sharik-e-hal hui hai

khushi ke lamhe to jun-tun guzar gae hain yahan par

bas ek saat-e-gham katni muhal hui hai

lakir nuur ki jo asman-e-dil pe bani hai

andheri raat ka hamla hua to Dhaal hui hai

Leave a Comment