Hawas-O-Hafize Ka Man Rah Gaya Hai Bas

havās-o-hāfize kā maan rah gayā hai bas

kahāñ kī yaad tirā dhyān rah gayā hai bas

tamām lashkar-e-aql-o-nigāh khet rahā

bisāt-e-ishq pe sultān rah gayā hai bas

vo aur haiñ ki jo ġham ko ġhalat bhī karte haiñ

ye dil to hijr se hairān rah gayā hai bas

ḳhadañg-e-ḳhvāb tujhe dil meñ le ke baiTh rahūñ

mire liye yahī āsān rah gayā hai bas

virāsatoñ ke sab ehsās gum hue ‘arshad’

mirī najāt ko īmān rah gayā hai bas

Leave a Comment