havas-o-hafize ka maan rah gaya hai bas
kahan ki yaad tira dhyan rah gaya hai bas
tamam lashkar-e-aql-o-nigah khet raha
bisat-e-ishq pe sultan rah gaya hai bas
vo aur hain ki jo gham ko ghalat bhi karte hain
ye dil to hijr se hairan rah gaya hai bas
ḳhadang-e-ḳhvab tujhe dil men le ke baiTh rahun
mire liye yahi asan rah gaya hai bas
virasaton ke sab ehsas gum hue ‘arshad’
miri najat ko iman rah gaya hai bas
Leave a Reply