hava.en laakh chalen lau sambhalti rahti hai
diye ki ruuh men kya chiiz jalti rahti hai
kise ḳhabar ki ye ik din kidhar ko le jaa.e
lahu ki mauj jo sar men uchhalti rahti hai
agar kahun to tumhen bhi na e’tibar aa.e
jo aarzu mire dil men machalti rahti hai
madar se nahin haTta koi sitara kyuun
ye kis hisar men har chiiz chalti rahti hai
vo aadmi huun sitare huun ya tamanna.en
samay ki raah men har shai badalti rahti hai
yunhi azal se hai ‘amjad’ zamin gardish men
kabhi sahar to kabhi raat Dhalti rahti hai
Leave a Reply