Rais Farogh
hava ne badal se kya kaha hai
ki shahr jangal bana hua hai
jahan miri kashtiyan nahin thiin
vahan bhi sailab aa gaya hai
umiid aur ḳhauf nachte hain
vo nach-ghar hai makan kya hai
sab us ki baten ghisi-piTi hain
magar vo paikar naya naya hai
vo ja chuka hai par us ka chehra
usi tarah mez par saja hai
sajili almariyon ke pichhe
nokile shishon ka silsila hai
jo saa.e ki samt ja rahe hain
vo main huun aur ek azhdaha hai
kalaf ke collar pahanne vaala
ik aadmi qatl ho raha hai
mira badan jis ko chahta tha
kisi ne vo zahr pi liya hai
Leave a Reply