hasinon se faqat sahib-salamat duur ki achchhi
na un ki dosti achchhi na un ki dushmani achchhi
zamana fasl-e-gul ka aur aghaz-e-shabab apna
abhi se tu ne tauba ki bhi ai zahid kahi achchhi
jafa-dost us ko kahta hai koi koi vafa-dushman
hamare saath to us ne nibahi dosti achchhi
tiri ḳhatir se zahid ham ne tauba aaj ki varna
ghaḌi bhar gham ghalat karne ko bas vo chiiz thi achchhi
ziyada ai falak de ranj-o-rahat ham ko jo kuchh de
na do din ka ye gham achchha na do din ki ḳhushi achchhi
kabhi jab haath mal kar un se kahta huun ki be-bas huun
to vo hans kar ye kahte hain tumhari bebasi achchhi
jo sach puchho hasinon ka haya ne rakh liya parda
nikal chalte gharon se ye to hoti dil-lagi achchhi
ham aa.en aap men ya-rab vo jis dam aa.en balin par
hujum-e-ranj-e-tanha.i se hai ye be-ḳhudi achchhi
mohabbat ke maze se dil nahin hai ashna jis ka
na us ki zindagi achchhi na us ki maut hi achchhi
vo mai-kash huun ki de kar duuni qimat sab ki sab le li
kisi se jab suna main ne ki bhaTTi men khinchi achchhi
use duniya ki sau fikren hamen ik rang-e-nadari
kahin mun.im ki daulat se hamari muflisi achchhi
ḳhushi ke ba.ad gham ka samna hona qayamat hai
jo gham ke ba.ad hasil ho vo albatta ḳhushi achchhi
na chuTegi mohabbat ghair ki ham se na chuTegi
aji ye baat tum ne aaj to khul kar kahi achchhi
hamare dida-o-dil men hazaron aib niklenge
tumhara aa.ina achchha tumhari arasi achchhi
tire is jubba-o-dastar se rindon ko kya matlab
jise jo vaz.a ho marghub ai zahid vahi achchhi
kahe sau sher tum ne sust to hasil ‘hafiz’ is ka
ghazal ho chust chhoTi si to baiton ki kami achchhi
Leave a Reply