Hasin Raaton Jamil Taron Ki Yaad Si Rah Gai Hai Baqi

Saifuddin Saif

hasin raton jamil taron ki yaad si rah ga.i hai baaqi

kuchh apni ujḌi hui baharon ki yaad si rah ga.i hai baaqi

har ek mahfil paḌi hai suuni tamam mele bichhaḌ chuke hain

sitamgaron ki sitam-shi.aron ki yaad si rah ga.i hai baaqi

gham-e-vafa kahne sunne vaale kahan ga.e ahl-e-dil na jaane

tumhari ulfat ke raz-daron ki yaad si rah ga.i hai baaqi

vo shaam se aarzu sahar ki vo be-kali raat raat bhar ki

un ashna ashna sitaron ki yaad si rah ga.i hai baaqi

udhar bhi ahd-e-vafa ke TukḌe khaTak ke pahlu men so chuke hain

yahan bhi TuuTe hue saharon ki yaad si rah ga.i hai baaqi

gila nahin ‘saif’ be-kasi ka kisi ka gham kaun puchhta hai

yahi bahut hai ki gham-gusaron ki yaad si rah ga.i hai baaqi