Iftikhar Arif
harim-e-lafz men kis darja be-adab nikla
jise najib samajhte the kam-nasab nikla
sipah-e-sham ke neze pe aftab ka sar
kis ehtimam se parvar-digar-e-shab nikla
hamari garmi-e-guftar bhi rahi be-sud
kisi ki chup ka bhi matlab ajab ajab nikla
baham hue bhi magar dil ki vahshaten na ga.iin
visal men bhi dilon ka ghubar kab nikla
abhi uTha bhi nahin tha kisi ka dast-e-karam
ki saara shahr liye kasa-e-talab nikla
Leave a Reply