Poet
haram-o-dair ke manzar nahin dekhe jaate
dekhne valon se patthar nahin dekhe jaate
surḳh-ru hain ki abhi paanv men chhale hain bahut
jehd valon men muqaddar nahin dekhe jaate
shauq-e-darman ho to aa raushni-e-dil le kar
zaḳhm-e-dil sham.a jala kar nahin dekhe jaate
ye to insanon ke TuuTe hue dil hain saaqi
ham se TuuTe hue saghar nahin dekhe jaate
jaag uThe hain to karen fikr-e-sahar ta-ba-sahar
pyaar ke ḳhvab mukarrar nahin dekhe jaate
Leave a Reply