aadhi aadhi raat tak saḌkon ke chakkar kaTiye
sha.iri bhi ik saza hai zindagi bhar kaTiye
shab ga.e bimar logon ko jagana zulm hai
aap hi mazlum baniye raat bahar kaTiye
jaal ke andar bhi main taḌpunga chiḳhunga zarur
mujh se ḳha.if hain to meri soch ke par kaTiye
koi to ho jis se us zalim ki baten kijiye
chaudhvin ka chand ho to raat chhat par kaTiye
rone vaali baat bhi ho to latifa janiye
umr ke din kaTne hi hain to hans kar kaTiye
Leave a Reply