Haram Kahta Hai Kuchh dair-e-Butan Kuchh Aur Kahta Hai

Sufi

haram kahta hai kuchh dair-e-butan kuchh aur kahta hai

tariq-e-manzil-e-varaftgan kuchh aur kahta hai

har ik se un ka vahshi dastan kuchh aur kahta hai

nahin hota jahan koi vahan kuchh aur kahta hai

amir-e-karvan kya hai khuda-e-karvan ham the

magar ab to ghubar-e-karvan kuchh aur kahta hai

har ik jalve men ik parda har ik parda men ik jalva

ba-har-surat sahab-e-darmiyan kuchh aur kahta hai

janab-e-shaikh ke lab par khuda ka naam aata hai

subuhi-kash magar vaqt-e-azan kuchh aur kahta hai

ye maana jannat-e-husn-e-nazar thi zindagi apni

magar khamyaza-e-umr-e-ravan kuchh aur kahta hai

miri hasti ka har zarra hai gunjaish-talab ab tak

ki pa kar vusat-e-kaun-o-makan kuchh aur kahta hai

qafas men laakh saman-e-tarab sayyad hai lekin

mira naala ba-nam-e-ashiyan kuchh aur kahta hai

nahin hoti hai hujjat khatm tanha ab-o-dana par

are sayyad asir-e-be-zaban kuchh aur kahta hai

utari ja rahi hain qaidiyon ki bediyan lekin

nishan-e-halqa-e-tauq-e-garan kuchh aur kahta hai

ajab uljhan men daala tu ne o munh pherne vaale

ki dil kuchh aur kahta hai guman kuchh aur kahta hai

mira har ek sajda muntazir hai qaul-e-faisal ka

jabin kuchh kah rahi hai astan kuchh aur kahta hai

kalam-e-‘mir’-o-‘mirza’ qabil-e-sad-naz hai ‘afqar’

magar ‘momin’ ka andaz-e-bayan kuchh aur kahta hai