har su hai tariki chha.i tum bhi chup aur ham bhi chup
kis ne aisi sham.a jala.i tum bhi chup aur ham bhi chup
kis janib hai apni manzil dorahe par aa pahunche
kis ne aisi raah bata.i tum bhi chup aur ham bhi chup
dasht-e-tapan men jaane kab se dil ne di hain avazen
koi bhi avaz na aa.i tum bhi chup aur ham bhi chup
raah kisi ki takte takte taare bhi ab raakh hue
sub.h ki devi bhi muska.i tum bhi chup aur ham bhi chup
dard ke be-payan sahra men duur talak hai sannaTa
zaḳhm-e-dil ne li angḌa.i tum bhi chup aur ham bhi chup
Leave a Reply