Har Su Hai Tariki Chhai Tum Bhi Chup Aur Hum Bhi Chup

har sū hai tārīkī chhā.ī tum bhī chup aur ham bhī chup

kis ne aisī sham.a jalā.ī tum bhī chup aur ham bhī chup

kis jānib hai apnī manzil dorāhe par aa pahuñche

kis ne aisī raah batā.ī tum bhī chup aur ham bhī chup

dasht-e-tapāñ meñ jaane kab se dil ne dī haiñ āvāzeñ

koī bhī āvāz na aa.ī tum bhī chup aur ham bhī chup

raah kisī kī takte takte taare bhī ab raakh hue

sub.h kī devī bhī muskā.ī tum bhī chup aur ham bhī chup

dard ke be-pāyāñ sahrā meñ duur talak hai sannāTā

zaḳhm-e-dil ne lī añgḌā.ī tum bhī chup aur ham bhī chup

Leave a Comment