har qadam manzil-e-be-nishan ki taraf
ya.ani ik lamha-e-imtihan ki taraf
gul nahin main utaro mujhe chaak se
main chala ku-e-shisha-garan ki taraf
ham ko ehsas-e-ghurbat hua kuchh siva
jab uTha.i nazar asman ki taraf
apni bechargi bebasi ki ḳhabar
ham ne bheji to hai la-makan ki taraf
yaar hasti uTha.e koi aur ab
ham chale qarya-e-javedan ki taraf
TuTna ye sitaron ka ‘sayyad’ miyan
hai ishara miri dastan ki taraf
Leave a Reply