Afzal Allahabadi
har naghma-e-pur-dard har ik saaz se pahle
hangama bapa hota hai aghaz se pahle
dil dard-e-mohabbat se to vaqif bhi nahin tha
janan tire bakhshe hue eazaz se pahle
shoalon pe chalati hai mohabbat dil-e-nadan
anjam zara soch le aghaz se pahle
ab meri tabahi ka use gham bhi nahin hai
jis ne mujhe chaha tha bade naaz se pahle
shahin vo kahlane ka haqdar nahin hai
jo su-e-falak dekhe na parvaz se pahle
ab raaz ki baten na bata de vo kisi se
ye khauf nahin tha kabhi hamraz se pahle
thi mir-taqi-‘mir’ ki nauhagari mash.hur
‘afzal’ ki sisakti hui avaz se pahle
Leave a Reply