har baat tiri jan-e-jahan maan raha huun
ab ḳhak-e-rah-e-kahkashan chhan raha huun
asnam se derina ta.alluq ki badaulat
main kufr ka har daur men iman raha huun
duniya se laḌa.i to azal hi se rahi hai
ab ḳhud se jhagaḌne ki bhi main Thaan raha huun
ab tak to shab-o-roz kuchh is tarah kaTe hain
jis ja bhi raha apna hi mehman raha huun
mansab ye mujhe jabr-e-mashiyat se mila hai
chalti hui lashon ka nigahban raha huun
vo sher huun jis ko abhi sochega zamana
likkha na gaya jis ko vo divan raha huun
be-taj huun be-taḳht huun be-mulk-o-hukumat
haan naam ka lekin main ‘sulaiman’ raha huun
Leave a Reply