haqiqat mahram-e-asrar se puchh
maza angur ka mai-ḳhvar se puchh
vafa aghyar ki aghyar se sun
miri ulfat dar o divar se puchh
hamari ah-e-be-tasir ka haal
kuchh apne dil se kuchh aghyar se puchh
dilon men Dalna zauq-e-asiri
kamand-e-gesu-e-ḳhamdar se puchh
dil-e-mahjur se sun lazzat-e-vasl
nashat-e-afiyat bimar se puchh
nahin juz girya-e-gham hasil-e-ishq
hamari chashm-e-dariya-bar se puchh
nahin ab-e-baqa juz jalva-e-dost
kisi lab-tishna-e-didar se puchh
fareb-e-vada-e-dildar ki qadr
shahid-e-ḳhanjar-e-inkar se puchh
fughan-e-shauq ko maane nahin vasl
ye nukta andalib-e-zar se puchh
tasavvur men kiya karte hain jo ham
vo tasvir-e-ḳhayal-e-yar se puchh
mata-e-be-baha hai sher-e-‘hali’
miri qimat miri guftar se puchh
Leave a Reply