Akbar Hameedi
hansi men saghar-e-zarrin khanak khanak jaae
shabab us ki sada ka chhalak chhalak jaae
dil-o-nazar men basi hai vo chand si surat
vo dil-kashi hai ki balak humak humak jaae
libas men hai vo tarz-e-tapak-e-araish
jo ang chahe chhupana jhalak jhalak jaae
qadam qadam tiri ra.anaiyon ke dar va hon
ravish ravish tira anchal dhalak dhalak jaae
nafas nafas ho saba ki tarah bahar-angez
ufuq ufuq gul-e-hasti mahak mahak jaae
nashat-e-qurb ke lamhon men us ki angḌai
ubhar ke ḳhak-e-badan se dhanak dhanak jaae
baqa ke raaz hain sab us pe munkashif ‘akbar’
vo shaḳh-e-sabz hava se lachak lachak jaae
Leave a Reply