Hamin Tak Rah Gaya Qissa Hamara

hamīñ tak rah gayā qissa hamārā

kisī ne ḳhat nahīñ kholā hamārā

paḌhā.ī chal rahī hai zindagī kī

abhī utrā nahīñ basta hamārā

muāfī aur itnī sī ḳhatā par

sazā se kaam chal jaatā hamārā

kisī ko phir bhī mahñge lag rahe the

faqat sāñsoñ kā ḳharcha thā hamārā

yahīñ tak is shikāyat ko na samjho

ḳhudā tak jā.egā jhagḌā hamārā

taraf-dārī nahīñ kar paa.e dil kī

akelā paḌ gayā banda hamārā

ta.āruf kyā karā aa.e kisī se

usī ke saath hai saaya hamārā

nahīñ the jashn-e-yād-e-yār meñ ham

so ghar par aa gayā hissa hamārā

hameñ bhī chāhiye tanhā.ī ‘shāriq’

samajhtā hī nahīñ saaya hamārā

Leave a Comment