vo dard-e-arzu
jo larza-bar-andam tha pahnae aalam men
vo harf-e-tishnagi
jo naghma-bar-lab tha dabistan-e-shab-e-gham men
vo ik duniya-e-na-paida-karaan thi
asman ki vusaten jis men samai thiin
bade gahre samundar maujzan the kurra-e-dil men
jinhen ik justaju-e-kham ne khamosh kar daala
bahut munh zor maujen thiin
jinhen khud ham ne paband-e-salasil kar diya ik din
faraz-e-koh se aate hue betab dariya the
jinhen ik daere men raqs karna ham ne sikhlaya
taqaze hosh-mandi ke hamare rahbar nikle
faraze-e-arzu se ham
nasheb-e-afiyat men aan nikle
aur maal-e-roz-o-shab ke besh o kam men gum hue
apni matta-e-khud-nigahi chhod aae
ik sukut-e-ahni hamrah le aae
mudava-e-alam koi nahin
bazm-e-nashat o dard-e-gham koi nahin
ik hu ka aalam hai
khade hain sahil-e-hasti pe ham
jiine ke be-payan bahane chhod aae
ik sukut-e-ahni hamrah le aae
hamari yaad ke kashkol khali hain
hamari ruuh ka naghma kahan hai?