riyaz-khairabadi

Hamare Dil Mein Koi Aarzu Nahin Baqi

hamare dil men koi aarzu nahin baaqi

hamare phuul men ab rang-o-bu nahin baaqi

bahut kahi dil-e-nadan adu nahin baaqi

mira adu mire pahlu men tu nahin baaqi

tumhare tiir ki ab aarzu nahin baaqi

hua hai piip kaleja lahu nahin baaqi

ye mai-kada hai ki masjid ye aab hai ki sharab

koi bhi zarf bara-e-vuzu nahin baaqi

dhara hai kya mire ghar men ki mohtasib lega

pur-az-sharab vo jam-o-subu nahin baaqi

vo rah ke ghair ki sohbat men ho gae kuchh aur

vo baat pichhli si agli si khu nahin baaqi

thaka pada huun to vamandgi ye kahti hai

unhen kisi ki bhi ab justuju nahin baaqi

jo mai ki buund na nikli to pad gaya paani

ba-hal-e-khvesh subu ab subu nahin baaqi

hamari aap ki baat uth rahi hai mahshar par

hamari aap ki kuchh guftugu nahin baaqi

jo nikle khaar to daman se suiyan uljhin

jagah zara si kahin be-rafu nahin baaqi

badhi hai baat qayamat men jhute vaade par

vo munfail hai to kuchh guftugu nahin baaqi

ye mohtasib hai abas ghar ko sunghta phirta

ki bund-bar bhi mai-e-mushk-bu nahin baaqi

hua hai aaine ke saath aks ko sakta

kisi men jaan tire ru-ba-ru nahin baaqi

bahen sharab ke dariya to ham ko lutf nahin

ki sabza kuchh bhi lab-e-abju nahin baaqi

badhi hai pak-nihadi ye bada-noshon ki

ki ab namaz men qaid-e-vuzu nahin baaqi

hamari aankh men tarik bazm-e-alam hai

jo zeb-e-bazm the vo shama-ru nahin baaqi

‘riyaz’ maut ko kyuun maut aai jaati hai

hamen to maut ki bhi aarzu nahin baaqi

More Poems

Leave a Comment