hamare darmiyan qurbat kahan thi
vo mil jaata miri qismat kahan thi
use chaha usi ke ḳhvab dekhe
siva us ke mujhe fursat kahan thi
mire dil men uThe tufan lakhon
magar lahje men vo shiddat kahan thi
bahut masruf rahta tha vo aḳhir
use mere liye fursat kahan thi
mujhe kahna tha hal-e-dil bhi us se
magar kahne ki bhi mohlat kahan thi
use khone ka ḳhadsha bhi tha lekin
use paane ki bhi chahat kahan thi
use kahti magar kaise main kahti
use kahne ki bhi himmat kahan thi
vo mujh se duur tha barson se lekin
nazar se duur vo surat kahan thi
mujhe bas us ka lahja chumna tha
siva us ke koi hajat kahan thi
Leave a Reply