Poet
hamare azm-e-safar ke aage saval-e-lail-o-nahar kya hai
gham-e-mohabbat uTha liya hai to gardish-e-rozgar kya hai
umid-e-farda pe jiine vaalo hayat ka e’tibar kya hai
uTho ki manzil bula rahi hai chalo ki ab intizar kya hai
bikharte phulon na ham se puchho hamen to ab yaad hi nahin hai
chalo ye ahl-e-chaman se puchhen sukun kya hai qarar kya hai
miri nigahon men phir raha hai tira takallum tira tabassum
miri nigahon se koi puchhe ye phuul kya hai bahar kya hai
nazar se daman bacha bacha ke main dil ko aarif bana raha huun
tumhare jalvon ki manzilon men nigah ka e’tibar kya hai
bahar-e-gul men qadam qadam par shu.ur-e-kamil ki hai zarurat
bahar un ke liye ḳhizan hai jo ye na samjhe bahar kya hai
Leave a Reply