Poet
ham-safar hai na ham-nava koi
hoga ham sa shikasta-pa koi
ik nazar kya mila gaya koi
ik qayamat uTha gaya koi
dekho nazren chura ke mat jaao
tum ko kah de na bevafa koi
dard dete ho do magar aisa
jis ki phir ho na intiha koi
jis rah-e-ishq par chala huun main
ibtida hai na intiha koi
sar to ḳhud jhuk gaya hai sajde men
jab tasavvur men aa gaya koi
mujh ko sajdon se kuchh gurez nahin
ho na jaa.e magar ḳhuda koi
main bata.unga manzilon ka pata
mujh se puchhe to rasta koi
Leave a Reply