Halak-E-Justuju Tha Hirs Ka Mara Na Tha Pahle

Syed Amin Ashraf

halak-e-justuju tha hirs ka maara na tha pahle

dahi dil hai magar itna bhi avara na tha pahle

manazir bagh-o-ban ke dil-kusha bhi dil-shikan bhi the

magar fitrat-shikan yuun vaqt ka dhara na tha pahle

jo hota gulshan-e-ḳhubi to hoti shan-e-mahbubi

vahi insan hai lekin shaḳh-e-sad-para na tha pahle

sukun tha saya-e-tuba jo miThi niind sote the

ki har ghar ḳhana-e-askandar-o-dara na tha pahle

chaman ke saath jalna hai safiran-e-chaman ko bhi

tamazat thi magar phulon men angara na tha pahle

ye duniya sa.eban DhunDegi phir agle zamanon men

ki zer-e-asman ye qahr-e-nazzara na tha pahle

main ju-e-nishat-o-gham huun koh-o-bagh-o-sahra men

ki maara hijr ka tha husn ka maara na tha pahle

sitara tha koi jis se munavvar thi ye tanha.i

nazar men zau-fishan ye asman saara na tha pahle