hai vahimon ka tamasha yahan vahan dekho
hamare paas mukammal khuda kahan dekho
dil-o-dimagh ke andar ana ki guunj suno
bala si koi lahu men ravan-davan dekho
nafas ka saanp kahan zer hone vaala hai
phir is ke baad koi aur imtihan dekho
ab apne ghar ke liye ik nai zamin socho
zamin ke sar pe koi taaza asman dekho
is ik saval ke kitne azaab jhel chuka
kuchh aur dard banu aur imtihan dekho
guzar ke jaana hai vahshat ke ek dariya se
yaqin na ho to yahan rasta kahan dekho
kahan se aaegi ab raushni mohabbat ki
bahut dhuan hai makanon ke darmiyan dekho
main be-yaqin huun aisa ki mere hathon men
tamam ayaten suraj ki raegan dekho
phata hua kisi uryan saval jaisa hai
hamare sar pe ye rahmat ka saeban dekho
nishan ret ke aae hain mere hisse men
nikal gaya hai bahut duur karvan dekho
masih maut ka paigham le ke aaya hai
ab aur kaun bachaega meri jaan dekho
mire huruf adhuri udaan jaise hain
mira shuur maani ka asman dekho
vo ek lamha hayat-ashna likho ‘ahmad’
vagarna saari kahani hi raegan dekho