Farhat Nadeem Humayun
hai vahi ek mere siva aur main
donon tanha hain mera ḳhuda aur main
hai ḳhulasa miri zindagi ka yahi
ek nakam harf-e-dua aur main
tirgi ḳhatm karne ki ummid par
raat bhar hi jala ik diya aur main
kaun jitega is jang men dekhiye
ho ga.e hain muqabil hava aur main
aa.i barkha ki rut mere dukh banTne
ro.e phir saath mil kar ghaTa aur main
ik taraf vo hai aur us ke saare sitam
ik taraf sabr ki intiha aur main
kyuun saza phir milegi kisi aur ko
hain gunahgar meri ana aur main
tishnagi ki alamat ke taur par
do hi naam a.enge karbala aur main
Leave a Reply