muneer-niyazi

Hai Us Gul-Rang Ka Diwar Hona

hai us gul-rang ka divar hona

ki jaise khvab se bedar hona

batati hai mahak dast-e-hina ki

kisi dar ka pas-e-divar hona

use rakhta hai sahraon men hairan

dil-e-shair ka pur-asrar hona

kamal-e-shauq ka hasil yahi hai

hamara shahr se be-zar hona

firaq aghaz hai un saaton ka

hai akhir jin ka vasl-e-yar hona

yahi hona tha akhir dasht-e-gham ko

hamare haath se gulzar hona

mohabbat ka sabab hai be-niyazi

kashish us ki hai bas dushvar hona

‘munir’ achchha nahin lagta ye tera

kisi ke hijr men bimar hona

More Poems

Leave a Comment