Hai Mere Gird Yaqinan Kahin Hisar Sa Kuchh

Husain Taj Rizvi

hai mere gird yaqinan kahin hisar sa kuchh

aur us ko bhi hai duaon pe e’tibar sa kuchh

kahin to gosha-e-dil men ummid baaqi hai

kahin hai us ki nazar men bhi intizar sa kuchh

kaha jab us ne ke ankhon pe e’tibar na kar

to main ne maang liya dil pe iḳhtiyar sa kuchh

ye saara khel faqat gardishon ka hai ahang

fuzul DhunD rahe ho yahan qarar sa kuchh

jo le ke aaya tha sailab ḳhushbuon ka kabhi

vo bhar gaya hai miri aankh men ghubar sa kuchh

utar chuka hai badan se tamam nasha-e-vasl

chaḌha chaḌha sa tabi.at pe hai ḳhumar sa kuchh

suna hai ye bhi buzurgi ki ik alamat hai

so main bhi hone laga ‘taj’ ḳhaksar sa kuchh