Ismail Merathi
hai jan-e-hazin ek lab-e-ruh-faza do
ai kaash ki is ek ki ho jaaen dava do
tha khar-e-jigar hijr men tanha gham-e-duri
hain afat-e-jan vasl men ab sharm-o-haya do
mastana-ravish kyuun na chale vo nigah-e-naz
ankhen hain ki hain jam-e-mai-e-hosh-ruba do
ji tang hai kya kijiye aur josh-e-bala ye
dil ek hai kya dijiye aur zulf-e-dota do
hai ain inayat jo nishan puchhiye mera
ye bhi nahin manzur to apna hi pata do
kya dam-e-fareb us ne bichhaya hai dil-avez
do aan phansen aur jo ho jaaen riha do
gar naz-khud-ara ko hai yaktai ka daava
kyuun aina dekha ki hue jalva-numa do
bebaki-o-shokhi bhi hai aur sharm-o-haya bhi
do mahram-e-asrar hain to parda-kusha do
do gesu-o-do zulf-e-bala-khez hain charon
haan kakul-e-khamdar bhi hain un ke siva do
vo tarz-o-ravish haae vo andaz-o-ada haif
kya bachte dil-o-jan kuja chaar kuja do
seri-e-nazar bhi na hui haae mayassar
ankhen jo huiin chaar lage tir-e-qaza do
Leave a Reply