Farah Iqbal
hadse hone lagen to ham dua ko DhunDte hain
maslakon ki qaid men rah kar ḳhuda ko DhunDhte hain
nochte hain ham badan se ḳhud qaba-e-zindagani
aur phir ham gum-shuda apni rida ko DhunDte hain
ham faza men gholte hain zahar ḳhud sochon ka apni
saans lene ke liye phir ḳhud hava ko DhunDte hain
maslahat ki badbani kashtiyon men baiTh kar ham
ishq ke gahre samundar men vafa ko DhunDte hain
vaqt ki bhigi hava men sahilon ki ret par ab
umr-e-rafta ke bikharte naqsh-e-pa ko DhunDte hain
kasa-e-dil ki khanakti ḳhvahishon ke shor-o-ghul men
asmanon se utarti ik sada ko DhunDhte hain
gard-e-mazi se lipaTte an-ginat chehron ke pichhe
aaj bhi ham tere chehre ki ziya ko DhunDte hain
Leave a Reply