hadisa ishq men darpesh hua chahta hai
dil shahanshah se darvesh hua chahta hai
ishq ko zid hai ki ta.amir kare shahr-e-umid
husn kam-baḳht bad-andesh hua chahta hai
is ilaqe se mira koi ta.alluq bhi nahin
ye ilaqa ki mira desh hua chahta hai
mere ash.ar men ghazlon main mire giton men
ek ka zikr kam-o-besh hua chahta hai
jaah ki chaah nahin ḳhvahish-e-mansab bhi nahin
mere andar koi darvesh hua chahta hai
malik-e-saut-o-sada sha.er-e-gumnam raza
teri dahliz pe ab pesh hua chahta hai
Leave a Reply