Haal Na Puchho Roz-O-Shab Ka Koi Anokhi Baat Nahin

Mumtaz Mirza

haal na puchho roz-o-shab ka koi anokhi baat nahin

din ko kaise raat kahen ham raat bhi ab to raat nahin

lagne ko to sehn-e-chaman men donon achchhe lagte hain

kanton men jo apna-pan hai phulon men vo baat nahin

dil se bhula to den ham un ko lekin is ko kya kiije

sadiyon ki rudad bhulana apne bas ki baat nahin

gulshan gulshan shakh o shajar par roz nasheman jalte hain

kis ne kaha tha mausam badla agle se halat nahin

ek zara si baat pe kyuun hai itna hangama ‘mumtaz’

shisha-e-dil hi to tuuta hai aur to koi baat nahin