Kaashif Shakiil
guzar rahi hai juda.i jo tujh pe shaaq to dekh
kabhi kabhi tu vara-e-had-e-firaq to dekh
miri talab na sahi mera ishtiyaq to dekh
ibaraton se pare aa zara siyaq to dekh
juda hain jism hamare juda hain rang-o-ravish
tu un ko chhoḌ ke ruhon ka ittisaq to dekh
tu iḳhtilaf ki saari haden bhula to sahi
tu iḳhtilaf pe ham sab ka ittifaq to dekh
kaTe hai vaqt bhale mujh ko kaaT kar hi kaTe
aTuuT gham hai ghamon ka ye tumtaraq to dekh
vo hai mariz jo har dam matin rahta hai
kabhi mizah to sun aur kabhi mazaq to dekh
vo miThe bol haqiqat men zahr-e-qatil hain
tu is naqab ke pichhe chhupa nifaq to dekh
ye hijr hijr nahin hai koi qayamat hai
ye chashm-e-tar na sahi dil ka inshiqaq to dekh
hue hain husn ke virsa tamam begane
hai ḳhali haath ye kashif ‘shakil’ aaq to dekh
Leave a Reply